Valideyn razılığı olmadan övladlığa götürmə hansı hallarda icra edilir?

"Övladlığa götürmə yalnız yetkinlik yaşına çatmayan uşaqlar barəsində və onların mənafeyi naminə, uşağın doğumu müvafiq icra hakimiyyəti orqanında qeydə alındıqdan sonra həyata keçirilir. Proses üç mərhələdən ibarətdir: övladlığa götürmək istəyən şəxsin (şəxslərin) uçota alınması, övladlığa götürmənin uşağın mənafeyinə uyğunluğunun müəyyən edilməsi və bu barədə məhkəmə qərarının qəbul olunması".

Bunu BiG.AZ-a açıqlamasında vəkil Rəşad Əliyev bildirib.

O, qeyd edib ki, qanunvericiliyə əsasən, bəzi hallarda valideynlərin razılığı olmadan da övladlığa götürməyə icazə verilir. Belə ki, valideynlər valideynlik hüquqlarından məhrum edildikdən sonra bir il keçibsə, fəaliyyət qabiliyyəti olmayan hesab olunublarsa və ya xəbərsiz itkin düşmüş kimi tanınıblarsa, onların razılığı tələb edilmir:

"Həmçinin valideynlər altı aydan artıq müddətdə uşaqla birlikdə yaşamır, qəyyumluq və himayə orqanlarının xəbərdarlıqlarına baxmayaraq uşağın tərbiyəsi və saxlanmasında iştirak etmir, ona valideyn qayğısı göstərmirlərsə, övladlığa götürmə razılıq olmadan da həyata keçirilə bilər".